ప్రజా అవసరాలకే ప్రభుత్వ స్థలాలు

కూకట్‌పల్లి నియోజకవర్గంలోని రమ్య గ్రౌండ్ వద్ద పాఠశాల కోసం కేటాయించిన మూడు ఎకరాల స్థలంలో పాఠశాల నిర్మాణానికి ప్రభుత్వం తక్షణమే నిధులు కేటాయించాలని ఎమ్మెల్యే కోరారు. అదేవిధంగా ఫిష్ మార్కెట్ పక్కన ఉన్న స్థలాన్ని ప్రజా అవసరాల దృష్ట్యా పెట్రోల్ బంక్ ఏర్పాటుకు కేటాయించాలని డిమాండ్ చేశారు.

ఎన్నో ఏళ్లుగా ప్రజలకు ఉపయోగపడుతున్న ట్రక్ పార్క్ స్థలాన్ని కూడా వేలం వేయడానికి ప్రయత్నించడం సరైన నిర్ణయం కాదని ఆయన అభ్యంతరం వ్యక్తం చేశారు. కూకట్‌పల్లిలో ప్రజా ప్రయోజనాల కోసం కేటాయించిన స్థలాలను విక్రయించే ప్రయత్నాలను అడ్డుకుంటామని స్పష్టం చేశారు.

హైదరాబాద్‌లో నీటి కష్టాలకు ప్రభుత్వమే కారణం

నగరంలో ఇప్పటికే నీటి సమస్య మొదలైందని, నీటి కొరత కారణంగా హాస్టళ్లు, కళాశాలలకు సెలవులు ప్రకటించాల్సిన పరిస్థితులు ఏర్పడుతున్నాయని ఎమ్మెల్యే పేర్కొన్నారు. నీటి ట్యాంకర్ల పేరుతో ప్రజల నుంచి అధిక మొత్తాలు వసూలు చేస్తూ దోపిడీ జరుగుతోందని ఆరోపించారు.

గత బీఆర్ఎస్ ప్రభుత్వ హయాంలో హైదరాబాద్‌లో విద్యుత్, నీటి సమస్యలు లేవని, ప్రస్తుత కాంగ్రెస్ ప్రభుత్వం అధికారంలోకి వచ్చిన తర్వాతే ఈ సమస్యలు మొదలయ్యాయని విమర్శించారు. ఢిల్లీపై చూపుతున్న శ్రద్ధ తెలంగాణ ప్రజల సమస్యలపై చూపడం లేదని ముఖ్యమంత్రి రేవంత్ రెడ్డి ప్రభుత్వంపై మండిపడ్డారు.

అక్రమ నిర్మాణాలపై చర్యలేవీ?

అయ్యప్ప సొసైటీలో అనుమతులు లేకుండానే భవన నిర్మాణాలు చేపడుతున్నారని, జీరో పర్మిషన్‌తో పది అంతస్తుల భవనాలు నిర్మిస్తున్నారంటూ ఎమ్మెల్యే ఆరోపించారు. ఇలాంటి నిర్మాణాల పేరుతో ప్రజలను దోపిడీ చేస్తున్నారని పేర్కొంటూ సంబంధిత అధికారుల చర్యలను ప్రశ్నించారు.

మీడియా స్వేచ్ఛపై ప్రభుత్వంపై విమర్శలు

తెలంగాణలో మీడియా, సోషల్ మీడియాలో ప్రభుత్వాన్ని ప్రశ్నిస్తూ మాట్లాడినా కేసులు నమోదు చేస్తున్నారని ఎమ్మెల్యే ఆరోపించారు. రాష్ట్రంలో రజాకార్ల పాలన కొనసాగుతున్నట్లుగా పరిస్థితులు ఉన్నాయని తీవ్ర వ్యాఖ్యలు చేశారు.

హౌసింగ్ బోర్డు స్థలాలపై హెచ్చరిక

హౌసింగ్ బోర్డు స్థలాలను వేలం వేయడం ద్వారా పేద, మధ్యతరగతి ప్రజల ప్రయోజనాలకు విఘాతం కలిగిస్తున్నారని ఎమ్మెల్యే మాధవరం కృష్ణారావు ప్రభుత్వంపై ధ్వజమెత్తారు. ప్రజలకు ఉపయోగపడాల్సిన స్థలాలను వేలం ద్వారా ప్రైవేటు వ్యక్తులకు అప్పగించే ప్రయత్నాలను వ్యతిరేకిస్తామని తెలిపారు.

బీఆర్ఎస్ ప్రభుత్వం తిరిగి అధికారంలోకి వస్తే, హౌసింగ్ బోర్డు స్థలాలను వేలంలో కొనుగోలు చేసిన వారి నుంచి తిరిగి స్వాధీనం చేసుకుని ప్రజలకు కేటాయిస్తామని హెచ్చరించారు.

ప్రజా ఆస్తులు ప్రజల కోసమే ఉండాలి. ప్రజా అవసరాల స్థలాలను విక్రయించే ప్రయత్నాలను ఎట్టి పరిస్థితుల్లోనూ సహించబోమని ఎమ్మెల్యే మాధవరం కృష్ణారావు స్పష్టం చేశారు.