పిఠాపురం నియోజకవర్గంలోని ఫకీర్‌పాలెం గ్రామంలో రూ.73 లక్షలతో సుందరీకరించిన మైసమ్మ చెరువు, వాకింగ్ ట్రాక్, ఓపెన్ ఎయిర్ జిమ్, పిల్లల పార్కును ఉప ముఖ్యమంత్రి పవన్ కల్యాణ్ ప్రారంభించారు. చెరువులను కేవలం నీటి వనరులుగా కాకుండా ప్రజలకు ఆరోగ్యం, ఆహ్లాదం అందించే సామాజిక వేదికలుగా తీర్చిదిద్దాలన్న లక్ష్యంతో అభివృద్ధి చేస్తున్నట్లు తెలిపారు.
నియోజకవర్గంలో సుందరీకరించిన మరో 11 చెరువులకు సంబంధించిన శిలాఫలకాన్ని కూడా ఆయన ఆవిష్కరించారు. చెరువు గట్టు బలోపేతం, పచ్చదనం, వాకింగ్ ట్రాక్, పిల్లల పార్కు వంటి సదుపాయాలను పరిశీలించారు.
ప్రధానమంత్రి కృషి సించాయీ యోజన సహకారంతో రాష్ట్రవ్యాప్తంగా చేపట్టిన 105 చెరువుల పనుల్లో సగానికి పైగా పూర్తయ్యాయని, మిగిలిన పనులను నెలాఖరులోగా ప్రజలకు అందుబాటులోకి తీసుకురావాలని లక్ష్యంగా పెట్టుకున్నట్లు పత్రిక కథనం పేర్కొంది.
