అభ్యుదయం హైదరాబాద్, సెప్టెంబర్ 3: ఎడమ మూత్రపిండంలో ట్యూమర్ ఉన్న 62 ఏళ్ల వ్యక్తికి రోబోటిక్ సాయంతో రాడికల్ నెఫ్రెక్టమీ శస్త్రచికిత్సను విజయవంతంగా నిర్వహించినట్లు అమోర్ హాస్పిటల్స్ ప్రకటించింది. శస్త్రచికిత్స అనంతరం రోగి వేగంగా కోలుకుని మూడో రోజున డిశ్చార్జ్ అయినట్లు ఆసుపత్రి తెలిపింది.
కడుపునొప్పి కారణంగా ఆసుపత్రిని సంప్రదించిన రోగికి సీటీ స్కాన్ సహా పలు పరీక్షలు నిర్వహించగా ఎడమ కిడ్నీలో ట్యూమర్ ఉన్నట్లు నిర్ధారణ అయిందని ఆసుపత్రి పేర్కొంది. వైద్య పరీక్షలు, ముందస్తు మూల్యాంకనం అనంతరం ట్యూమర్ ఉన్న మూత్రపిండాన్ని తొలగించే రోబోటిక్ లెఫ్ట్ రాడికల్ నెఫ్రెక్టమీని వైద్య బృందం చేపట్టింది.
ఈ శస్త్రచికిత్సను ‘మేక్ ఇన్ ఇండియా’ ఎస్ఎస్ఐ మంత్ర రోబోటిక్ సర్జికల్ సిస్టమ్ సాయంతో నిర్వహించినట్లు కన్సల్టెంట్ ఆంకాలజిస్ట్, అడ్వాన్స్‌డ్ లాపరోస్కోపిక్ అండ్ రోబోటిక్ సర్జన్ డాక్టర్ కల్యాణ్ వంగర తెలిపారు. సరైన రోగుల ఎంపికతో రోబోటిక్ విధానం ద్వారా చిన్న గాట్లతో, అధిక ఖచ్చితత్వంతో క్లిష్ట శస్త్రచికిత్సలు చేయడానికి అవకాశం ఉంటుందని ఆయన పేర్కొన్నారు.
అమోర్ హాస్పిటల్స్ మేనేజింగ్ డైరెక్టర్ డాక్టర్ బి. కిషోర్ రెడ్డి మాట్లాడుతూ, ఆధునిక సాంకేతికతను అందుబాటు ధరల్లో పేషెంట్లకు చేరవేయడమే లక్ష్యమని చెప్పారు. ఈ శస్త్రచికిత్సలో డాక్టర్ పూజిత యల్లా, మత్తు మందు నిపుణుడు డాక్టర్ జగదీష్, క్రిటికల్ కేర్ నిపుణురాలు డాక్టర్ ప్రత్యూష నేతృత్వంలోని బృందం సహకరించినట్లు ఆసుపత్రి వెల్లడించింది.
కారణం తెలియకుండా కడుపునొప్పి పదేపదే వస్తే ఆలస్యం చేయకుండా వైద్యులను సంప్రదించి పరీక్షలు చేయించుకోవాలని వైద్యులు సూచించారు.
