గుండె ఆరోగ్యానికి ధూమపానం, కొలెస్ట్రాల్, అధిక రక్తపోటు ప్రధాన ముప్పు అని భావిస్తున్నప్పటికీ, చుట్టూ ఉన్న వాతావరణ కాలుష్యం కూడా హృద్రోగాలకు దారితీస్తోందని తాజా అధ్యయనాలు వెల్లడిస్తున్నాయి. ఏళ్ల తరబడి రద్దీ రహదారుల పక్కన లేదా పారిశ్రామిక వాడల్లో నివసించే వారిలో రక్తనాళాల సమస్యలు అధికంగా ఉంటున్నాయి. యూరోపియన్ హార్ట్ జర్నల్ నివేదిక ప్రకారం, ప్రపంచవ్యాప్తంగా కాలుష్యం కారణంగా ఏటా 88 లక్షల మంది అదనంగా ప్రాణాలు కోల్పోతున్నారు. గాలిలోని సూక్ష్మ ధూళికణాలు నేరుగా రక్తప్రసరణ వ్యవస్థపై ప్రభావం చూపి పక్షవాతం, గుండెపోటు ముప్పును పెంచుతున్నాయి. వీటితో పాటు ట్రాఫిక్, విమానాల రణగొణ ధ్వని శరీరంలో స్ట్రెస్ హార్మోన్లను ప్రేరేపించి రక్తపోటును పెంచుతోంది. గుండె వ్యాధుల నివారణలో కేవలం మందులకే పరిమితం కాకుండా, పర్యావరణ కాలుష్య నియంత్రణ, పరిశుభ్రమైన రవాణా వ్యవస్థల కల్పనపై సమాజం ఉమ్మడిగా దృష్టి సారించాలని నిపుణులు సూచిస్తున్నారు.
For more information on this article, please refer to Page Number 7, అభ్యుదయం (Abhyudayam) E-paper dated 08-10-2026.
