సంగారెడ్డి/హైదరాబాద్:
తెలంగాణ రాష్ట్ర పౌర సరఫరాల శాఖ చరిత్రలో సరికొత్త అధ్యాయం మొదలైంది. రాష్ట్రవ్యాప్తంగా పీడీఎస్ లబ్ధిదారులకు అత్యాధునిక స్మార్ట్ రేషన్ కార్డుల పంపిణీ కార్యక్రమాన్ని ఆగస్టు 15న సంగారెడ్డి వేదికగా ముఖ్యమంత్రి ఎ. రేవంత్ రెడ్డి లాంఛనంగా ప్రారంభించనున్నారు.
​గతంలో పేపర్ కార్డులు త్వరగా పాడైపోవడం, నలిగిపోవడం వంటి ఇబ్బందులను గమనించిన ప్రభుత్వం, వాటి స్థానంలో ఏటీఎం లేదా డెబిట్ కార్డు సైజులో ఉండే పీవీసీ స్మార్ట్ కార్డులను రూపొందించింది. ఈ కార్డుపై కుటుంబ యజమాని ఫోటో, ఎఫ్‌పీఎస్ షాప్ నంబర్, డీలర్ వివరాలు, క్యూఆర్ కోడ్ ముద్రించారు. రేషన్ దుకాణాల్లో ఈ-పాస్ యంత్రాల వద్ద లబ్ధిదారులు ఈ స్మార్ట్ కార్డులను సులభంగా స్వైప్/స్కాన్ చేసి తమకు కేటాయించిన సరుకులను పారదర్శకంగా పొందవచ్చని పౌర సరఫరాల శాఖ అధికారులు తెలిపారు.