പുരോഗതി ഹൈദരാബാദ്, സെപ്തംബർ 3: ഇടത് വൃക്കയിൽ ട്യൂമർ ബാധിച്ച 62കാരന് റോബോട്ടിക് സഹായത്തോടെ റാഡിക്കൽ നെഫ്രെക്ടമി ശസ്ത്രക്രിയ വിജയകരമായി നടത്തിയതായി അമോർ ഹോസ്പിറ്റൽസ് അറിയിച്ചു. ശസ്ത്രക്രിയയ്ക്ക് ശേഷം രോഗി വേഗത്തിൽ സുഖം പ്രാപിച്ചതായും മൂന്നാം ദിവസം ഡിസ്ചാർജ് ചെയ്തതായും ആശുപത്രി അറിയിച്ചു.
വയറുവേദനയെ തുടർന്ന് ആശുപത്രിയിലെത്തിയ രോഗിയെ സിടി സ്‌കാൻ ഉൾപ്പെടെ നിരവധി പരിശോധനകൾക്ക് വിധേയനാക്കിയപ്പോൾ ഇടതു വൃക്കയിൽ ട്യൂമർ ആണെന്ന് കണ്ടെത്തി. മെഡിക്കൽ പരിശോധനകൾക്കും പ്രാഥമിക വിലയിരുത്തലിനും ശേഷം, ട്യൂമർ ഉള്ള വൃക്ക നീക്കം ചെയ്യുന്നതിനായി മെഡിക്കൽ സംഘം ഒരു റോബോട്ടിക് ലെഫ്റ്റ് റാഡിക്കൽ നെഫ്രെക്ടമി നടത്തി.
'മെയ്ക്ക് ഇൻ ഇന്ത്യ' എസ്എസ്ഐ മന്ത്ര റോബോട്ടിക് സർജിക്കൽ സിസ്റ്റത്തിൻ്റെ സഹായത്തോടെയാണ് ഈ ശസ്ത്രക്രിയ നടത്തിയതെന്ന് കൺസൾട്ടൻ്റ് ഓങ്കോളജിസ്റ്റ്, അഡ്വാൻസ്ഡ് ലാപ്രോസ്കോപ്പിക് ആൻഡ് റോബോട്ടിക് സർജൻ ഡോ. കല്യാണ് വംഗര പറഞ്ഞു. ശരിയായ രോഗിയെ തിരഞ്ഞെടുക്കുന്നതിലൂടെ, റോബോട്ടിക് സമീപനം സങ്കീർണ്ണമായ ശസ്ത്രക്രിയകൾ ചെറിയ മുറിവുകളോടെയും ഉയർന്ന കൃത്യതയോടെയും നടത്താൻ പ്രാപ്തമാക്കുമെന്ന് അദ്ദേഹം പ്രസ്താവിച്ചു.
ആധുനിക സാങ്കേതികവിദ്യ മിതമായ നിരക്കിൽ രോഗികളിൽ എത്തിക്കുകയാണ് ലക്ഷ്യമെന്ന് അമോർ ഹോസ്പിറ്റൽസ് മാനേജിങ് ഡയറക്ടർ ഡോ.ബി.കിഷോർ റെഡ്ഡി പറഞ്ഞു. ഡോ.പൂജിത യല്ല, അനസ്‌തേഷ്യോളജിസ്റ്റ് ഡോ. ജഗദീഷ്, ക്രിട്ടിക്കൽ കെയർ സ്‌പെഷ്യലിസ്റ്റ് ഡോ. പ്രത്യുഷ എന്നിവരുടെ നേതൃത്വത്തിലുള്ള സംഘമാണ് ഈ ശസ്ത്രക്രിയയിൽ സഹകരിച്ചതെന്ന് ആശുപത്രി വെളിപ്പെടുത്തി.
കാരണം അറിയാതെ വയറുവേദന ആവർത്തിച്ച് വന്നാൽ താമസിക്കാതെ ഡോക്ടറെ കണ്ട് പരിശോധന നടത്തണമെന്നാണ് ഡോക്ടർമാർ നിർദേശിക്കുന്നത്.
