പടിഞ്ഞാറൻ-മധ്യ ബംഗാൾ ഉൾക്കടലിൽ രൂപം കൊണ്ട തീവ്ര ചുഴലിക്കാറ്റ് കലിംഗപട്ടണത്തിന് സമീപം തീരം കടന്നതിനാൽ തെലങ്കാനയിലും ആന്ധ്രാപ്രദേശിലും കനത്തതോ അതിശക്തമായതോ ആയ മഴ പെയ്യുകയാണ്. തെലങ്കാനയിലെ ഖമ്മം, ജയശങ്കർ ഭൂപാലപള്ളി, ഭദ്രാദ്രി കോതഗുഡെം, മഹബൂബാബാദ്, വാറങ്കൽ തുടങ്ങിയ ജില്ലകളിൽ ജനജീവിതം സ്തംഭിച്ചിരിക്കുകയാണ്. മണൂഗൂരിലെ സിങ്കരേണി ഓപ്പൺകാസ്റ്റ് ഖനികളിലേക്ക് മഴവെള്ളം കയറിയതിനെ തുടർന്ന് കൽക്കരി ഉത്പാദനം നിലച്ചിരിക്കുകയാണ്. ശക്തമായ കാറ്റിൽ പലയിടത്തും വൻ മരങ്ങളും വൈദ്യുത തൂണുകളും കടപുഴകി. മഴയുടെ തീവ്രത കണക്കിലെടുത്ത് മഹബൂബാദ്, ഖമ്മം, വാറങ്കൽ ജില്ലകളിലെ സ്‌കൂളുകൾക്ക് അധികൃതർ അവധി പ്രഖ്യാപിച്ചു. പല ജില്ലകളിൽ ഓറഞ്ച് അലർട്ടും ചില ജില്ലകളിൽ യെല്ലോ അലർട്ടും കാലാവസ്ഥാ വകുപ്പ് പുറപ്പെടുവിച്ചിട്ടുണ്ട്.പ്രളയബാധിത പ്രദേശങ്ങളിലെ ദുരിതാശ്വാസ പ്രവർത്തനങ്ങൾക്കായി ഖമ്മത്ത് പ്രത്യേക കൺട്രോൾ റൂം തുറന്നിട്ടുണ്ട്. അടുത്ത രണ്ട് ദിവസം കൂടി ശക്തമായ മഴയ്ക്ക് സാധ്യതയുള്ളതിനാൽ ജനങ്ങൾ ജാഗ്രത പാലിക്കണമെന്ന് അധികൃതർ മുന്നറിയിപ്പ് നൽകിയിട്ടുണ്ട്.
(കൂടുതൽ വിവരങ്ങൾക്ക് 'അഭ്യുദയം' ഇ-പേപ്പർ പേജ് നമ്പർ 1, 2 കാണുക (തീയതി: 25-09-2026).
